Pwysig
– Gofynnwn yn garedig i chi osgoi anfon unrhyw gynnyrch cnau (gan gynnwys ‘nutella’) ym myrbrydau neu focsys bwyd eich plant gan fod plant yn yr ysgol sydd ag alergeddau.
– Hefyd, gofynnwn i chi dorri unrhyw fyrbrydau megis grawnwin neu domatos yn eu hanner cyn eu bod yn dod i’r ysgol os gwelwch yn dda.
Cinio ysgol a bwyta’n iach
Darperir cinio poeth yn yr ysgol ond gall plant ddod â brechdanau os ydynt yn dymuno. Serch hynny, rhaid nodi, oherwydd rhesymau diogelwch, ni chaniateir dod â photeli gwydr i’r ysgol. Gwarchodir y plant yn ystod yr awr ginio gan arolygwyr pendodedig a Chynorthwywyr Dysgu Dosbarth (CDD).
Pris arian cinio yw £2.60/diwrnod.
I archebu cinio mae angen defnyddio ParentPay – https://www.parentpay.com/
Gwasgwch ar “For Parents” i logio mewn ac i weld atebion i gwestiynau. Os nad ydych erioed wedi archebu cinio, cysylltwch a’r ysgol am gyfrinair. Os ydych chi wedi anghofio’ch manylion logio mewn, ewch i “How to add account recover details” o dan FAQ ar parentpay.com.
Mae’n rhaid archebu bwyd cyn 20.00 y noson gynt. Ni chodir tâl arnoch os yw’ch plentyn yn absennol o’r ysgol.
Mae gan rhai teuluoedd yr hawl i gael cinio ysgol am ddim. Mae ffurflenni cais ar gael yn swyddfa’r ysgol os ydych am wneud cais.
Dylai fod eich plentyn yn ymwybodol o ymddygiad da wrth y bwrdd bwyta:-
- Dim siarad â cheg yn llawn o fwyd
- Dim cerdded o gwmpas y neuadd â bwyd yn eu cegau.
- Dim taflu bwyd o gwmpas
- Dim cyfnewid bwyd gyda’u ffrindiau
- Dim colli bwyd ar y llawr
- Defnyddio cyllell a fforc yn gywir
Brechdanau bwyd iach
Disgwylir i’r plant sy’n bwyta brechdanau gael pecyn o fwyd iach. Dim siocled na losin. Mae cyflenwad o ddŵr ar gael felly nid ydym yn hapus i weld sudd ffrwyth ac ni chaniateir pop. Mae sawl teulu yn paratoi pecyn o basta a salad a darnau o ffrwyth.
Rhoddir sticeri i blant sy’n gwneud ymdrech i fwyta eu bwyd i gyd ac am fwyta’n iach.
Egwyl
Caniateir i’r plant ddod â ffrwyth i fwyta amser chwarae. Os oes modd torri’r ffrwyth i fyny cyn iddynt ddod i’r ysgol, mae hyn yn sicrhau bod mwy o siawns iddynt fwyta eu ffrwyth yn hytrach na bwyta rhan ohono am eu bod eisiau chwarae.
Llaeth am ddim
Mae Cynulliad Cenedlaethol Cymru wedi penderfynu rhoi llaeth am ddim i bob plentyn yn y Cyfnod Sylfaen (Meithrin, Derbyn, Bl 1 a 2).
Dŵr
Rydym yn deall pwysigrwydd yfed dŵr yn aml yn ystod y dydd. Mae perfformiad meddyliol yn gwella drwy yfed dŵr ac mae plant yn gallu canolbwyntio’n well pan nad ydynt yn dioddef o symtomau diffyg hylif – syched, blinder a sensitifrwydd. Mae gennym ffynnon ddŵr yn yr ysgol a chwpanau wrth y sinc ym mhob dosbarth.
Mae Ysgol Mynydd Bychan yn ‘Ysgol Iach’ ac rydym yn dilyn canllawiau Llywodraeth Cymru ar gyfer Ysgolion Iach. O ganlyniad, gofynnwn yn garedig i chwi beidio ag anfon cacennau pen-blwydd i’r ysgol.
